தாய்ப் பாசம்

காட்சி 1 - காலை மணி ஆறு.

அம்மா...அம்மா...

அட..அதுக்குள்ள எழுந்தாச்சா? இப்போ என்ன அவசரம்னு 6 மணிக்கே எழுந்துட்டே? ... சமையல இன்னும் ஆரம்பிக்கவேயில்லை. இன்னும் காபி கூட குடிக்கல... இப்போ உனக்கு சேவை செய்யணும்... உங்க அப்பா வேறே இன்னும் எழுந்துக்கவேயில்ல. அப்படியும் எழுந்தார்னா, நேரா கம்பியூட்டர்லதான் போய் உக்காருவாரு. அவருக்கு காபி, டிபன், ஆபீஸ்க்கு சாப்பாடு இன்னும் எல்லாம் நாந்தான் செய்யணும். எனக்கு உதவி செய்ய யாராவது இருக்காங்களா?
எல்லாம் என் தலையெழுத்து. இன்னும் கொஞ்ச நேரம் படுத்துக்கோ. நான் வரேன்.

அம்மா...அம்மா...

ஏன்டி என் ப்ராணனெ வாங்குறே?...இன்னும் கொஞ்ச நேரம் தூங்கினா என்ன குடி முழுகிப்போயிடும்?.. இரு 5 நிமிஷத்திலே வரேன்..

காட்சி 2 - மாலை மணி 5

இடம்: விளையாட்டு மைதானம்.

ஆண்டி, மது இங்கேதான் எங்க கூட கண்ணாமூச்சி விளையாடிட்டிருந்தா... இப்போ திடீர்னு அவளை காணோம். எங்கே ஒளிஞ்சிருக்கான்னே தெரியல்லே...

(சிறிது தேடலுக்குப் பிறகு மது கிடைத்துவிட்டாள்)..

என் செல்லம்... எங்கேடி போய் ஒளிஞ்சிக்கிட்டே... உன்னெ பெத்து வெளியே கொண்டு வறத்துக்கு எவ்ளோ கஷ்டப்பட்டிருப்பேன்... ஒரு ரெண்டு நிமிஷம் நீ இல்லாமே எனக்கு ஒண்ணும் புரியவேயில்லெ. கை, காலெல்லாம் உதறலெடுத்து, தலை சுத்தற மாதிரி இருந்துச்சு. உனக்கு ஒண்ணும் இல்லாமே கிடைக்கணும்னு கடவுள்கிட்டே வேண்டிக்கிட்டேன். நாளைக்கே கோயிலுக்குப் போய் நெய் விளக்கு ஏத்தணும். ஊர்லே எங்கே பாத்தாலும் பிள்ளை பிடிக்கறவன் சுத்திட்டிருக்கான். இனிமே என்னை விட்டு ஒரு நிமிஷம்கூட போகமாட்டேன்னு சொல்லுடா கண்ணு...

காட்சி 3 - காலை மணி ஆறு.

(மீண்டும் காட்சி 1-ஐ படித்துக் கொள்ளவும்).